Ի գիտություն բոլոր ուսանողների

Ղեկավարվելով «Բարձրագույն և հետբուհական մասնագիտական կրթության մասին»ՀՀ օրենքով, ՀՀ Կառավարության 2005 թվականի սեպտեմբերի 15-ի թիվ 1716-Ն որոշմամբ հաստատված «Երևանի Մխիթար Հերացու անվան պետական բժշկական համալսարան» պետական ոչ առևտրային կազմակերպության (այսուհետ` Համալսարան) կանոնադրությամբ և հիմք ընդունելով ռեկտորի համապատասխան հրամանները հաստատվել են բաց թողնված դասերի լրացման, ինչպես նաև լրացուցիչ դասերի ժամանակացույցի մասին կարգերը:

Բաց թողնված դասերի լրացման կարգը

Հաստատվել է համալսարանի ուսանողների բաց թողնված (բացակայած) դասերի լրացման հետևյալ կարգը.

1. Ուսանողները պարտավոր են ուսուցման մասին պայմանագրով նախատեսված պայմաններով և Համալսարանի կողմից սահմանված կարգով ու ժամկետներում կատարել ուսումնական ծրագրերով նախատեսված բոլոր առաջադրանքները, հաճախել դասերին` առանց ուշացման: 

2. Եթե ուսանողը` ուսուցման մասին պայմանագրով նախատեսված վարձավճարի սահմաններում և Համալսարանի կողմից սահմանված ուսումնական ծրագրերով և ժամանակացույցով նախատեսված դասերից բացակայել է, Համալսարանի կողմից նախատեսվում են լրացուցիչ վճարովի դասընթացներ, հետևյալ պայմաններով` 

   ա) 2 շաբաթ և ավելի տևողությամբ առարկաների ցիկլային պարապմունքներից բացակայելու դեպքում ուսանողը պարտավոր է լրացնել յուրաքանչյուր բացակայած դասի 1 համապատասխան շաբաթը. Ցիկլերի ընթացքում դասի տևողությունը համընկնում է յուրաքանչյուր օրվա ուսուցման տևողությանը 

   բ) դասերի բացթողումը (բացակայելը) դասերին չներկայանալն է և այն բացակայությունները, որոնք նշանակվել են ուսանողի` դասերից ուշանալու պատճառով: Դասից ուշացում է դիտվում դասի մեկնարկից և դասամիջոցից հետո ուշացումը. 

   գ) գործնական պարապմունքներին հաճախումների գրանցումը դասախոսի կողմից պետք է կատարվի դասի մեկնարկից հետո 5 րոպեի ընթացքում` ուսումնական մատյանում: Դասախոսություններից բացակայությունները գրանցվում են համապատասխան մատյաններում.

   դ) ուսանողի ներկայության դեպքում դասամատյանի համապատասխան վանդակում պետք է գրանցվի «ն» տառը, իսկ բացակայության դեպքում`«բ» տառը: 

3. Սույն կարգը վերաբերում է`

   ա) ընդհանուր բժշկության ֆակուլտետում` ուսուցման 4-րդ և բարձր տարիներին,

   բ) ստոմատոլոգիական ֆակուլտետում` ուսուցման 3-րդ տարվա երկրորդ կիսամյակին և բարձր տարիներին,

   գ) դեղագիտական ֆակուլտետում` ուսուցման 4-րդ և բարձր տարիներին: 

4. Լրացուցիչ դասընթացները, որպես կանոն, անցկացվում են ձմեռային և ամառային քննաշրջանների ընթացքում, որոնց ժամկետները սահմանվում են ռեկտորի կողմից: 

5. Լրացուցիչ դասընթացների համար վճարման չափը որոշվում է` ելնելով ռեկտորի կողմից հաստատված յուրաքանչյուր առարկայի կրեդիտների գնացուցակից` համապատասխան ժամկետների համամասնական չափերով: 

6. Ուսանողների բացակայությունները քննարկվում են և ներկայացվում է եզրակացություն` ուսումնական աշխատանքների գծով պրոռեկտորի նախագահությամբ անցկացվող ուսումնական խորհրդի կողմից, որի կազմի մեջ են մտնում ուսումնամեթոդական վարչության պետը, համապատասխան ֆակուլտետների դեկանները, հաշվապահական բաժնի և իրավաբանական բաժնի ներկայացուցիչները, ուսումնական աշխատանքների գծով պրոռեկտորի կողմից ներգրավված այլ աշխատողներ, ինչպես նաև ուսանողության ներկայացուցիչներ: Եզրակացությամբ հարգելի համարվող բացակայությունների հետևանքով լրացման վճարները փոխհատուցվում են Համալսարանի կողմից կամ օրենսդրությամբ չարգելված այլ միջոցների հաշվին: 

7. Լրացուցիչ վճարովի դասընթացներին իրենց ցանկությամբ` կամավոր կարող են մասնակցել նաև դասերին լիարժեք մասնակցած բոլոր կուրսերի ուսանողները: 

8. Պարտադիր լրացուցիչ դասընթացների համար դասախոսի ընտրությունը կատարվում է համապատասխան ամբիոնի վարիչի և դասախոսի համաձայնությամբ, իսկ կամավոր լրացուցիչ դասընթացների համար` ամբիոնի վարիչի, դասախոսի և ուսանողի համաձայնությամբ: 

9. Պարտադիր լրացուցիչ դասընթացների համար համապատասխան դասախոսը վճարվում է հիմնական դասաժամերի համար սահմանվածչափերով, իսկ կամավոր լրացուցիչ դասընթացների համար` ռեկտորի կողմից որոշված կարգով:

Հարցեր, պատասխաններ, մեկնաբանություններ